تخيل إن ضنايا بقلم نور محمد
قالت بصوت بارد عمري ما سمعته منها قبل كده
خلاص يا كريم الاتنين ماتوا.
رد كريم وهو بيبص علينا
اتأكدي كويس إحنا مش ناقصين غلطة.
حسّيت بإيدها وهي بتقرب من وشي
وقفت أنفاسي حرفيًا ثواني كانت أطول من عمري كله
وبعدين قالت
اطمّن خلصنا.
بعدها سمعتهم بيبعدوا شوية وصوتهم واطي وهم بيعيدوا الكلام
هنقول إن العربية فرملت فجأة ونزلوا يتفرجوا على المنظر واتزحلقوا
وأحنا حاولنا نلحقهم بس معرفناش
دموعي كانت بتنزل بصمت مش من الألم من الخذلان.
بعد ما صوتهم اختفى عادل همس
لسه عايشة؟
بصعوبة شديدة قلت
آه
قال بسرعة
استحملي أول ما يمشوا خالص
عدّت دقايق يمكن عمر كامل
لحد ما اتأكدنا إنهم فعلاً مشيوا.
بدأنا نزحف كل حركة كانت عذاب
لكن فكرة واحدة كانت بتسوقنا
مش هنموت مش قبل ما الحقيقة تظهر.
بعد حوالي نص ساعة سمعنا صوت عربية جاية.
كانت عربية نقل صغيرة والسواق أول ما شافنا صرخ
يا ساتر يا رب!! مين عمل فيكم كده؟!
أغمى عليا بعدها
فتحت عيني في المستشفى
الدكاترة حواليا وأجهزة ووجع في كل حتة.
أول حاجة سألت عليها
جوزي؟
قالوا
عايش حالته مستقرة.
قفلت عيني ودموعي نزلت الحمد لله.
لكن المفاجأة كانت بعدها بساعات.
دخل علينا ظابط الشرطة، وقال
إحنا عارفين
بصيت له وأنا قلبي بيدق
عرفتوا إزاي؟
قال
العربية بتاعت بنتك وجوزها لقينا فيها حاجة غريبة.
وسكت لحظة وبعدين كمل
كان في كاميرا داش كام شغالة وسجلت كل حاجة.
اتسعت عيني بصدمة.
كل حاجة؟!
آه صوت وصورة.
بعد يومين شفت التسجيل.
نور بنتي
وهي بتقول
لازم نخلص منهم النهارده التوكيل بقى معانا خلاص، ومفيش حد هيشك فينا.
وكريم بيرد
وأخوكي؟ اللي حصل له زمان؟
سكتت لحظة وبعدين قالت ببرود
اللي حصل زمان لازم يتدفن للأبد.
وقتها قلبي مات للمرة التانية.
بس المرة دي مفيش دموع.
بس نار.
بعد أسبوع
الشرطة قبضت عليهم.
نور كانت
أنا معملتش حاجة! دي كانت حادثة!
لكن التسجيل كان أقوى من أي كدب.
وكمان لما فتحوا موبايلها
لقوا رسايل بينها وبين كريم بتخطط لكل حاجة من شهور.
يوم المحكمة
بصّت لي من القفص
نفس النظرة القديمة بس المرة دي فيها خوف.
قالت
ماما أنا كنت خايفة
بصّيت لها وقولت بهدوء
وأنا كنت مصدقاكي لحد ما قتلتي كل حاجة جوايا.
الحكم صدر
المؤبد.
ليها ول كريم.
رجعنا البيت أنا وعادل
بس البيت مكنش زي الأول.
في صور ناقصة وضحكة اتكسرت
وقلب عمره ما هيرجع زي زمان.
عادل بص لي وقال
سامحتيني؟
سكت شوية وبعدين قلت
يمكن بس عمري ما هنسى.
أما أنا
اتعلمت
مش كل اللي بنربيهم بيطلعوا شبهنا.
وفي ناس بتتولد مننا لكن عمرها ما كانت لينا.
