انتي
انتي لحد امتي هتفضلي مهملة في نفسك كدة يا الاء اانا زهقت كل يوم اجي الاقيكي بنفس شكلك باختلاف لون الجلبية ،،انتي مبتغيريش من البنات والستات اللي بتشوفيهم عالفيس حتي اللي بتقعدي عليه
كانت الاء بتسمع كلام معتز جوزها وهي بتبص للسماء بقلة حيلة فكملت تطبيق هدوم وهي بتقول ببرود عكس النار اللي جواها
الاء/ بقولك ايه يا معتز ،،انت اللي مبتزهش من الاسطوانة بتاعة كل يوم دي وبعدين يا سيدي ايدي علي كتفك اتفضل هاتلي بيبي سيتر لولادك واديني مصروف شخصي ليا وانا اعمل اللي انت عايزه
معتز بزهق/ يووه ،،انتي معندكيش غير الرد ده ،، دايما الفلوس هي الشماعة اللي بتحطي غلطك عليها وبعدين ما عندك مرات كرم اخويا علطول علي سنجة عشرة ومش مخلية جوزها يبص برة عشان مهتمية بنفسها
الاء بحدة/ لا لو جيت للحق بقي فانا اقولك الفرق بس متزعلش ،، ولو اني مبحبش المقارنة بس انت اللي بدأت يا معتز ،، كرم اخوك علطول شايف بيته من طلبات واي حاجة نهلة مراته بتطلبها بيجبها يعني مبيقولهاش معيش وهو معاه واخد بالك وثانيا بقي نهلة معهاش عيال يعني فاضية لكن انا اللهم بارك معايا اتنين وجاين ورا بعض يعني مبلحقش اشم نفسي وزود بقي عليهم اهم حاجة ان اخوك عامل لمراته كرامة مع اهله مش مخليها مرمطون البيت وليل نهار طالعه نازلة ،، لما تبقي تعمل زي اخوك يا حبيبي ابقي تعالي اتكلم معايا واطلب اللي انت عايزه
معتز اتعصب ومقدرش يتكلم ولا يرد علي الاء لان عارف ان كلامها صح فقام وسابلها الشقة وخرج فابتسمت الاء بسخرية لانها عارفة ان كلامها مش هيجيب نتيجة وده لان معتز سلبي
تاني يوم كانت واقفة الاء بتعب في المطبخ بعد ما سوت الاكل اللي جهزته من بليل وروقت الشقة لحماتها ،، شطبت المواعين وخرجت لحماتها اللي بتتفرج عالتلفزيون
الاء بتعب / انا طالعة يا ماما عايزة حاجة ؟
رباب باستغراب/ انتي طالعة فين ؟ والناس اللي زمانها علي وصول دي مين اللي هيضايفهم ؟
الاء بحزن/ يعني هقابل الناس كدة يا ماما ؟،، هدومي متبهدلة مكان الاكل والترويق هطلع اغير هدومي واريح بس شوية ولما يجو رني عليا هنزلك
رباب بحسم/ لا مفيش طلوع ،،ادخلي خدي جلبية من بتوعي وخدي دش هنا وغيري ،،انا مضمنش الناس ممكن تيجي في اي وقت
الاء بضيق/بس يا ماما انا متعودتش اخد راحتي برة شقتي وقولت لحضرتك لما يجو ضيوفك رني عليا هنزلك
رباب بغضب/ انتي رغاية ليه ما قولتلك لا ،،اسمعي الكلام وخشي غيري عندك الهدوم في الدولاب
كانت الاء هتتكلم بس دخل معتز اللي شافهم بيتناقرو
معتز بضيق/في ايه بتتناقرو ليه ؟
رباب بضيق/ مراتك عايزة تطلع تغير هدومها فبقولها خدي جلبية من عندي وغيري هنا عشان نسايب حسن اخوك ممكن يجو في اي وقت مش راضية ومنشفة راسها
الاء بتنهيدة/ منا قولتلك يا ماما ان مش هينفع واني متعودتش علي كدة ما تقولها يا معتز ؟
معتز بجدية/ اسمعي الكلام يا الاء وامي مش عاوزة تتعبك
الاء بصت لمعتز بحزن وخزلان وسابتهم ودخلت اوضة حماتها بقلة حيلة ومعتز مهتمش غير انه فضي المشكلة واخد بعضه وطلع علي شقته ورباب بتبتسم بانتصار
..........................
كان معتز قاعد عالسفرة هو وامه واخواته الاتنين حسن وخطيبته خلود وكرم اللي كانت قاعدة جنبه نهلة مراته وكلهم بياكلو ماعدا الاء اللي كانت بتخدم عليهم
خلود باحراج/ هي الاء مش هتاكل معانا ولا ايه مش كفايا انها هي اللي عاملة الاكل بايديها
حسن بجدية/ صحيح يا معتز ما تنادي مراتك دي من صباحية ربنا وهي واقفة بتعمل الاكل
رباب بضيق/ وفيها ايه يعني ،،ما كنا بنعمل اكتر من كدة ،،كلو انتو وهي لما تشطب المطبخ هتبقي تاكل
معتز بلا مبالاه / ايوة هي متعودة دايما بتاكل بعدينا
كانت سامعة الاء كلام حماتها وجوزها ودموعها بتنزل بقهر ،،كان صعبان عليها نفسها وانها بتتعامل علي انها خدامه ليهم ومش عارفة هتفضل كدة لحد امتي ،،انتبهت الاء لصوت نهلة سلفتها فمسحت دموعها بسرعة
نهلة بسخرية/ تسلم ايدك يا الاء الاكل طعمه تحفة بس يا خسارة كالعادة مكنتيش موجودة عشان تاكلي منه ،انا معرفش انتي ايه اللي عاملاه في روحك ده ،، بس تصدقي جلبية حماتي هتاكل منك حتة
الاء بحزن/لو خلصتي شماتة يا نهلة اخرجي عشان اشوف اللي ورايا اصلي كلامك الخايب ده ميشغلنيش عشان كل واحد بيعمل بأصله
نهلة بصتلها بغضب وخرجت والاء حطت ايديها علي وشها وفضلت تعيط كالعادة زي كل مرة من يوم ما اتجوزت وللاسف مش هتقدر تتكلم او تعترض او تعمل لنفسها كرامة لان مالهاش اهل
............................
بعد فترة كانت الاء في شقتها بتشرب المية بعد ما اخدت علاجها لانها كانت تعبانة وعندها دور برد جامد فقررت ترتاح انهاردة ومنزلتش خالص لحماتها فكانت عارفة ان اليوم مش هيعدي علي خير لان اكيد حماتها هتكلم معتز جوزها ومش هتهدي غير لما يتخانق معاها وفعلا معداش ساعتين الا وكان داخل معتزل وباين عليه الغضب
الاء بتعب / قبل ما تزعق اسمع مني اللي حصل ولو غلطت ابقي اعمل اللي انت عايزه يا معتز
معتز بغضب / ده علي اساس ان امي هتكدب ،،انتي ليه منزلتيش يا الاء انهاردة وانتي عارفة ان عمي جمال جاي هو ومراته وعاصم ابنهم عشان يتغدو معانا ؟يعني امي اللي هتخدم عليهم
الاء بتعب/ يعني انت مش شايف انا تعبانة ازاي يا معتز ،،ده انت نازل الصبح وشايفني بموت ومهنش عليك حتي تقولي الف سلامة عليكي وخوفت احسن اقولك اني مش هنزل انهاردة ،، حرام عليك ،،انت ليه مش حاسس بيا
معتز بتوتر / وايه يعني ؟،، انتي مش اول ولا اخر واحدة يجيلها شوية برد
الاء بحزن/ ومع ذلك نزلت يا معتز ،، نزلت وخلصت اللي ورايا كله وطلعت ارتاح شوية ،،هي امك هتعمل ايه غير انها هتغرفلهم الاكل ولما كلمتني قولتلها سيبي المواعين لبكرة وانا هعملهم ،،اعمل ايه اكتر من كدة ،، انت ليه مش بتقدر اي حاجة بعملها عشانك ،،انا مستحملة ومش بتكلم رغم اني مبلاقيش تقدير منك ولا حتي كلمة حلوة ،، بالعكس علطول شايف اني مجبرة اعمل ده مع اني مش مجبرة يا معتز
معتز بغضب / لا مجبرة ،،انتي فاكرة نفسك
